SAMOA, January 7 - O lea ua tuta i le Nofoalii o le Atua la tatou faafetai ma le viiga, e pei ona saunoa iai le Susuga i le Taitai o le Sauniga. Ua mafa foi i liu, le tōmatau faaleagaga o lenei taeao, aua le faamoemoe sa lupe, i le faatautoina o afioga i Sui Usufono o le Fono a Sui Tofia.

Ou te faatulou atu i lau afioga i le Ao Mamalu o le Malo ma lau Masiofo, Afifio Sui o le Fono a Sui Tofia, Lau afioga i le Sui Palemia ma Minisita o le Kapeneta, ma Minisita Lagolago. Afio lau afioga i le Faamasino Sili ma Alii ma Tamaitai o le Faamasinoga a Samoa, Afio lau afioga i le Fofoga Fetalai faapea Sui Mamalu uma o le Fono Aoao Faitulafono.

Le paia o le aufaigaluega totofi a le Atua ua o tatou aleaga faatasi i lenei sauniga. Le paia o aiga, uo ma e masani. Ae a le faafofoga taupai mai a le atunuu i lenei taeao. O paia aua Aiga ma latou Tama, o Tama foi ma Aiga, Tumua ma Pule, Ituau ma Alataua, Aiga i le Tai ma le Vaa o Fonoti. Ou te faatulou atu.

Ou te momoli atu le faamalo ma le faafetai i a outou afioga i Sui o le Fono a Sui Tofia ua faatautoina i lenei sauniga. O le faasinomaga a le Faavae o le Malo Tutoatasi o Samoa, sa faavae a’i le faamautuina o nei tofiga, e pei ona fofogaina aloaia e le afioga i le Fofoga Fetalai o le Maota, i le tauaofiaga mulimuli a le Palemene iā Tesema o le tausaga na te’a nei.

Ou te talitonu i le sē’ei mai o lau afioga i le Tui Atua, Lau Susuga i le Malietoa, faapea lau afioga i le Le Laulu, o tofiga e faapogai le Atua. Auā o tofiga uma o fai nei, e mafua ona o le Atua. Tatou te talitonu foi, o lo tatou faasinomaga e ala i tiute ma faiva ua tofia ai i tatou, e nanea se tatou tautua ona o le topule mai a lo tatou Matai Sili, ma le fesoasoani a lona Agaga Paia.

I le fuafuaina mai o lo tatou Faavae e o tatou tua’ā ua fai i lagi le folauga, sa faatulaga lelei ai matafaioi, ma aiaiga o nei tofiga taualoa e lagolagosua i le tofiga o le Ao Mamalu o le Malo. Tatou te faafetaia ai le tōfā tatala ma le moe saili i le Atua a nai o tatou tua’ā, sa o latou muai asā tai sousou o le faatuina o lo tatou Malo Tutoatasi.

E le fou nei tofiga iā outou afioga. Lea e afio mai le afioga i le Tui Atua sa ia tauveina lenei tofiga i tausaga ua mavae. Ou te taofi o le a lagomaluina ma taoto i lagotonu lo outou sa se’e tolu i le anofale o le galuega, o le a faatino e le Fono a Sui Tofia.

Ou te avea lenei laolao taua, e toe momoli atu ai le agaga faafetai ma le faamalo i lau afioga Le Mamea Ropati Maulia, i lou tauaveina o le tofiga o le Sui o le Fono a Sui Tofia talu mai le 2016. Faafetai le faatoatoa, faamalo le pale i le tauaveina o matafaioi faale faavae o lenei tofiga. Ia faamanuia le Atua i lau afioga.

O le tatalo ia aualiitia e le Silisili Ese e ala i lona mana ma lona filemu, le tulai mai o a outou afioga i Sui o le Fono a Sui Tofia. Tatou lalafo iā te Ia, le galuega na te faatonu ma faapalepale mai. Tatou te mulumulu aufoe ma tā liu faatasi iā tatou faatinoga uma, auā la tatou tautua iā Samoa ma ona tagata.

Ia faafualoa e le Atua lo outou soifua laulelei. Ia faatumu la outou utu i le poto ma le faaaliga aua le tauaveina o la tatou galuega.

Ia manuia le amataga o galuega o lenei tausaga fou aemaise o la tatou faasifoga i le Atua i lenei vaiaso paia, o tatalo ma anapogi a le atunuu.

SOIFUA.

ATA PUEINA- Leota Marc Membrere. Savali/Govt. of Samoa

January 16, 2025