[Aso Faraile 3 Ianuari 2025]

O le asō, 3 Ianuari 2025 e molia aloaia ai le Afioga ia Laauli Leuatea Polataivao Fosi i mataupu na muai agiga i faasalalauga a le alii o Sam Leau e uiga i le maliu ai o se taule’ale’a aoga, lea e le’i mafai ona maua i ai se faaiuga.

E le o se mataupu faatauva’a le molia o se Minisita o le Kapeneta ma e i ai ona aafiaga mo le Malo e ui e lē se moliaga tau i le tofiga. Peita’i o le a lē avea tofi e tulaga ese ai le faatinoga o faagasologa o le Tulafono, i ni soligā tulafono. I lenei lava mataupu ua maea foi moliaga o se isi Faipule, o leoleo e to’alua, o se tamaitai tusitala ma se tasi alii. Ua faaalia foi e le Matagaluega o Leoleo, o loo faagasolo pea le tapenaina o moliaga mo isi foi tagata i lenei lava mataupu.

Ua le o toe po malaē i tu’ua’iga ma felauaiga i luga o fola faasalalau i le va o tagata e aofia ai ma Faipule i lenei mataupu. Ua tele foi faaseā, faitioga ma tu’ua’iga e faasaga i le Matagaluega o Leoleo.

O le faagasolo o lenei mataupu i le Faamasinoga ua tatau ma talafeagai. O inā e faamaonia ai pe lē faamaonia ai foi moliaga o i latou uma ua aafia. O le Faamasinoga o le malu lea faa-le-tulafono e avanoa mo so’o se tagata Samoa e saili i ai le amiotonu.

O le mau faaletulafono, e tauave lava le amiotonu o le tagata vagana ai ua faamaonia lana solitulafono.

O le faigamalo a le Faatuatua i le Atua Samoa ua Tasi (FAST) na faatulai mai ma lana anava tauave o le pule faaletulafono. Ma o le faaiuga foi a le Faamasinoga e faamaonia ai le faatautoga o Sui o le Palemene i le faleie, na mafai ai loa ona tatala le to’a o le ulufale o le Malo fou.

Samoa e, ia mau pea le to’ovae ma lalafo i le Atua la tatou folauga i le amataga o lenei tausaga fou, aua o ia na te faatonu ala ma lavea’i i to’atugā ma luitau e alia’e mai i le tatou folauga.

January 8, 2025