SAUNOAGA AUTU AFIOGA LEOTA LAKI LAMOSITELE SIO MINISITA O PISINISI, ALAMANUIA MA LEIPA I LE FAAILOAINA O LE TAIALA A LE VAEGA MAOTI O FEFAATAUAIGA, PISINISI MA OLOA GAOSI 2024/25 – 2028/29; ma le FUAFUAGA AUTASI 2024/25 – 2028/29 A LE MATAGALUEGA:
SAMOA, June 20 - 21 IUNI 2024, TAUMEASINA RESORT
Afifio a tatou paaga tau atina’e;
Faauluuluga ma sui o le Malo faapea Pisinisi Tumaoti;
Le mamalu ma le Paia ua aofia i lenei aso.
Oute faatalofa atu i lo outou paia ma lo outou mamalu i lenei vaega o le aso. Faafetai i lo outou tali sapaia o le valaau atu a le matagaluega faapea lenei vaega maoti, sei o tatou auai faatasi ile faamoemoe i le asō. E foi pea le viiga i lo tatou tapaau i le lagi ona ua ia taitai mai lo outou soifua faapea so matou ola i lenei aso.
O lea, oute fiafia e fa’alauiloa atu le Fuafuaga a le vaega maoti o Fefa’ataua’iga, Pisinisi, ma Oloa Gaosi (TCMSP) mo le 2024/25 – 2028/29 ua maea ma faamaonia e le Kapeneta. O lenei fuafuaga o se vaega taua aua le Taiala mo le Atinae o Samoa (PDS) 2021/22 – 2025/26, e taulaʻi i le ‘Unaia o tomai fou ma faatupulaia le atinaeina o pisinisi’.
O le va’aiga taulai ma le faamoemoe o lenei fuafuaga “Ia gafataulimaina le Gaosiaina o oloa, Pisinisi ma Fefa’ataua’iga, ina ia siitia ai le tamaoaiga ma unaia tagata uma o loʻo aʻafia i nei vaega ina ia mafai ona tali atu i luʻitau ma suiga maaleale, faapea le sailia avanoa fou mo le tuputupu aʻe.
E ono ni taunuuga autu o le a taulai iai le faatinoga o lenei fuafuaga:
1. Si’itia oloa gaosi ma tulaga tau fefaatauaiga;
2. Fa’ateleina oloa ma avanoa mo le auina atu i maketi i fafo;
3. Ia gafataulimaina le atinae o Pisinisi Tumaoti ma siitia avanoa faigaluega;
4. Fa’aleleia Tulaga tau Atina’e Tetele;
5. Fausia auala e e mafai ai ona tali atu i luitau ma suiga; faapea le
6. Fa’aleleia o le Siosiomaga mo Pisinisi.
O le ausiaina o nei sini e moomia ai lo tatou galulue fa’atasi. E momoli atu ai faamlo ma le faafetai ia i latou uma na saofagā i lenei fuafuaga ma o le naunautaiga ia faaauau ai pea lo tatou galulue faatasi e mafai ai ona ola ma faatupulaia le manuia o fefa’ataua’iga, pisinisi, ma oloa gaosi i le atunuu.
E momoli atu le agaga faafetai i paaga uma faapea paaga tau atinae aemaise le Malo o Niu Sila mo la latou lagolago faifaipea ua mafai ai ona faamautu ma faamaeaina lenei fuafuaga ma tatou faatasitasi ai i lenei aso.
Ou te fiafia foi e faailoa atu le Fuafuaga Autasi a le Matagaluega ua maea fausiaina ma faamaonia mo le 2024/25-2028/29. O lenei Fuafuaga o lo’o fa’ailoa mai ai galuega fa’ata’atia ma mana’oga mo alagaoa e fa’amautinoa ai o lo’o i ai se sao taua a le Matagaluega i le atina’eina o so’o-tamaoaiga a Samoa, e pei ona va’aia i le PDS a le Malo ma le Fuafuaga a le vaega maoti o Fefaatauaiga, Pisinisi ma Oloa Gaosi.
Faafetai
Ata Pueina – Malo o Samoa (Pesetā Tusiga Taofiga)
Legal Disclaimer:
EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.
