Malelega a le Ao Mamalu o le Malo le Afioga Tuimalealiifano Vaaleto’a Sualauvi II i le Faailogaina o le 100 Tausagao Avele – 11 Iuni 2024, Avele, Apia Samoa
SAMOA, June 11 - MANATU AUTU; AVELE, NEI GALO LE ATUA. AVELE, LEST YOU FORGET GOD
Lau susuga i le Taitai o le sauniga.
Lau Afioga i le Tamaitai Palemia ma le Kapeneta ma Minisita Lagolago.
Lau Afioga i le Fofoga Fetalai ma Sui Mamalu o le Palemene.
Lau Afioga i le Sui o le Tupu-Kings Representative o le Atu Kuki.
Lau Afioga i le Taitaifono ma le Paia o le Mafutaga o Tama ma Teine Tuai o Avele.
Lau Afioga i le Alii Pule, le vasega o Faiaoga ma le Laumua o Tama ma Teine Aoga o Avele.
Le paia o le Aufaigaluega Totofi a le Atua ae tainane le paia maualuga o Samoa ua potopoto mai i lenei aso.
O lea ua motu i liu le atu a le tautai matapalapala, ma ua utupupu foi le vai o le tautaialii. Ua lafoia foi i ulugalu ataata o tauleleia ina ua siliofe tautai o le gataifale ae a’e manuia i fanua le faatautaiga. Ua fia gagana ai nei le faugagana, sei faailo i lagimalie le viiga o le Atua, ona o le faamoemoe ua taunuu o le laau o le soifua lea. O lea ua tatou tepa ai nei i ula, ma ua tagai i matagofie. Auā o le Atua lava sa na ia taitai folau i lou sa, ua tau ai i manū lou faamoemoe i le asō, i le faamanatuina o lou 100 tausaga Avele.
Ou te faafetai atu mo lenei avanoa, ou te faia ai se upu faalaeiau mo le senetenari, poo le atoaga o le 100 tausaga a lo tatou Kolisi o Avele.
Ma le faaaloalo tele; e faamalulu atu ai, o lea o le a ou tautala ae le o a’u o se tama tuai o le tatou aoga. Ae ou te faailoa atu, sa ou fia aoga lava i Avele a o ou laitiiti, auā sa ou faalogo i viiviiga o le Kolisi e faia pea e le tuagane o lo’u tina sa i Avele ma nofo tumau ai. Ou te talitonu o ia o se tasi o uluai tama tuai o Avele na faamanuiaina i le faailoga PHD, ina ua malaga i Amerika ma toe aoga ai. Na avea mulimuliane ma Faifeau Toeaina i Faleasao i Manu’a, Amerika Samoa, seia oo ina malolo manumalo.
Na mafua ona ou le aoga i Avele, ona e naunau le tuafafine Katoliko o lo’u tamā ia avea a’u ma Patele pe a ou matua. Ae mana’o lo’u tinā LMS, ou te alu i le Kolisi Faafaifeau i Malua ina ia fai a’u ma Faifeau pei o lo’u uso matua.
Na ou amata i le aoga itumalo e tasi a Aana i Vailuutai, e aooga uma ai tamaiti mai Faleasiu e oo i Falelatai. O aso na, e fiu e savali i le aoga auā e le tele ni pasi ma ni taavale e feoa’i ai. Ona maua lea o lo’u avanoa i le Kolisi o Samoa, ma sosoo ai ma le Kolisi i Malua tusa ma le manao o lo’u tina. Ona faasolo mai ai lea i le alofa o le Atua isi laasaga o le olaga seia oo mai i lenei ituaso. O loo ua tatou mafuta ai e faamanatu lenei aso taua o le 100 tausaga o le Kolisi o Avele e pele ia Samoa.
O le fesili, aisea e pele ai Avele?
Auā o le Kolisi sa aooga ai tuua, o uso, o tuagane, o tuafafine, o fanau, o aiga foi ma uō e pele ma mamaē. Tatou te mitamita ai auā ua faatulai mai ai i Avele nisi o Taitai iloga ma le aoga, e pei o le uluai Fofoga Fetalai o le Maota o Samoa; o nisi o Minisita o le Kapeneta, ma Faipule o le Palemene; o nisi o Faauluuluga o Matagaluega ma Faalapotopotoga a le Malo; o nisi o Taitai o Ekalesia, Faifeau Toeaina, o Sea ma le Aufaigaluega Totofi a le Atua; o nisi o Fomai, Loia, Su’etusi, Faaao o le Iunivesite o Samoa, ma isi tulaga tofi maualuluga: o nisi o Fai Pisinisi, Fai Atinae, ma Faifaatoaga; o nisi o Taitai ma Matai o Afioga ma Alalafaga. Ua tele naua lo outou sao, i le Malo, o ekalesia, o pisinisi, o nuu, ma le atunuu aoao. Faapea ma le faagatama i taaloga eseese a aoga ma taaloga faavaomalo i le lalolagi, aemaise le avea ai ma siamupini i le lakapi mo tausaga e tele i lau taaloga faatausala, lau taalo malosi, ma le loto taalo ua tuutasi ina ia manumalo. Ua oo foi i atu motu o le vasa Pasefika au faamanuiaga o le poto ma le atamai lea ua tatou faatasi ai i lenei sauniga ma le Sui o le Tupu-Kings Representative o le Atu Kuki. Your Excellency Tom Masters and your Good Lady. Ua maoae lau matati’a Avele, ua e ausia i le Selau Tausaga o lau auaunaga. Ua saō faalalelei, ua malo. Ua malie ō.
Talofa i le tautiga o e sa asaina le vao filifili, ina ua faatuina lenei Kolisi mo alo ma fanau a Samoa ma isi atunuu o le Pasefika. Talofa i le fitaituga o Pule Aoga ma Faiaoga sa tauivi ia popoto ma atamamai le tupulaga lalovaoa. Talofa i le titifaitama o matua, sa latou uuna’ia ai alo ma fanau ia sailimalo i aoaoga, auā so latou lumanai manuia, ae tainane so latou sao mo Samoa i ona vaega eseese, nei ma a taeao. Faamalo, Faafetai.
E ui ua faiilagi le folauga a le toatele o le mamalu o le atunuu oē sa muaimalae ma sa faaauauina le aoaoina i Avele, faapea ma e sa Puleaoga, ma e sa galulue o ni faiaoga i Avele i totonu o lenei uluai 100 tausaga, ae manatua pea ma faatauaina i latou uma ma lo latou soifua taumafai, faapea ma a latou galuega. Ia faafoi atu ai pea le viiga ma le faamanu i lo tatou matai sili i le lagi. Avele, nei galo le Atua ina ua manuia ou ala. Nei galo le Atua ina ua e maua le poto, nei galo le Atua ina ua e maua le malosi. Nei galo le Atua ina ua e maua le tamaoaiga. Ia manatua ai i lenei ituaso le finagalo o lo tatou Atua, ‘aua nei mitamita le tagata poto i lona poto, ‘aua nei mitamita le tagaga malosi i lona malosi, ‘aua nei mitamita foi le mauoa i ana oloa; a o lē mitamita, inā mitamita ia o ia i lenei mea, ina ua mafaufau o ia, ma ua iloa a’u, o a’u lava le Alii, o lē faia le alofa, ma le faamasinoga, ma le amiotonu i le lalolagi; auā o mea ia ou te fiafia i ai, o lo’o fetalai mai ai le Alii.
O aso foi faapenei e manatua ai o le tatou faigamalaga i lenei olaga, e pei o le faigamalaga a le nuu filifilia o le Atua, le nuu o Isaraelu. A oo ina feagai ma puapuaga, ua na o le Atua le faamoemoe. Ae a oo ina taugalemu, ua tuulafoai ma faagalo le Atua. O le agaga lena o le poloai o le Atua i le fanauga a Isaraleu, a o lei sopoia le Ioritana e o atu ai i Kanana, (Teuteronome 8: 11 – 14) Ia oe, nei galo ia te oe o le Alii lou Atua, i lou le tausi i ana poloaiga, ma ana faamasinoga, ma ana tulafono, ou te fai atu ai ia te oe i le aso nei; nei e ‘ai ma e maona, ma e faia fale lelei, ma nofo ai; pe tupu tele foi lau lafu povi ma lau lafu mamoe, pe faateleina foi au ario ma au auro, pe faateleina foi au mea uma; ona faamaualugaina ai lea o oe, ma e faagalogalo i le Alii lou Atua o le na aumaia oe na i le nuu o Aikupito, o le mea sa nofo pologa ai.
Avele, o le finagalo foi lena o le Atua mo tatou uma. ‘Aua lava nei galo o ia ina ua tatou manuia ma maua le faaeaina. Ia tatou faimalaga pea ma ia i le tatou savaliga, tatou te manuia ai. Auā o ia o lo tatou talita, e fai ia ma o tatou mamalu, o ia lava e faaeaina o tatou ulu.
Ia faamanuia tele le Atua ia Avele ma le faamanatuina o lou 100 tausaga, ma lau auaunaga mo Samoa. Ia to mai lagī manuia mo le paia ma le mamalu ua potopoto mai i lenei aso taupoina.
Ia soifua ma ia manuia.
![May be an image of 3 people and text](https://scontent-sjc3-1.xx.fbcdn.net/v/t39.30808-6/447995219_854711426692009_4159351437199909960_n.jpg?stp=dst-jpg_s720x720&_nc_cat=105&ccb=1-7&_nc_sid=5f2048&_nc_ohc=4IPlR1Gj2SgQ7kNvgF0ei-W&_nc_ht=scontent-sjc3-1.xx&oh=00_AYBBVTYdbQjpbw9VdGYh7Am0ZxePAN2LcuTPRgxhZfK7pA&oe=6678314D)
![](https://www.einpresswire.com/tracking/article.gif?t=2&a=VO05B9dLBnFxKFRR&i=gFUUl1vYr7V3Aomh)